Бишкекте бир катар курулуш компанияларга айып салынды

Бишкекте бир катар курулуш компанияларга айып салынды.

Муниципалитеттен билдиришкендей, төмөнкү компаниялар шаарды көрктөндүрүү эрежелерин бузган:

• Чүй проспектиси, 127/1 дарегиндеги "Престиж Би Центр" ЖЧКсы жолдун тротуар бөлүгүн зыянга учуратты. Атап айтканда, тосмону демонтаждоо жана жылдыруу уруксат документтери жок жүргүзүлгөн. Аталган компания КР Укук бузуулар жөнүндө кодексинин 177-беренесинин 1-бөлүгүнүн негизинде 17 миң сом айып пул алган.
• "Техник Трейд" ЖЧКсы жолду (асфальтты) зыянга учураткандыгы жана уруксат берүүчү документтери жок жер казгандыгы үчүн КР Укук бузуулар жөнүндө кодексинин 177-беренесинин 1-бөлүгү жана 179-берененин 2-бөлүгү менен компанияга жалпы суммасы 34 миң сом айып салынган.
• "Аманат Строй Инвест" курулуш компаниясы дөңгөлөктөрдү жууй турган пункту болсо да, атайын техниканын дөңгөлөктөрүн жуубай, көчөлөрдүн бирин булгаган. Инспекция тарабынан компанияга чара көрүлүп, КР Укук бузуулар жөнүндө кодексинин 177- беренесинин 2-бөлүгү менен 23 миң сом айыпка жыгылган. Компанияга жолду тазалоого 1 күндүк мөөнөт берилген.
• Ак-Өргө конушундагы "Шер Курулуш" ЖЧКсынын жанаша аймагы санитардык тазалыкка жооп бербегендиги үчүн инспекторлор курулуш компаниясына КР Укук бузуулар жөнүндө кодексинин 114 жана 115-беренелеринин 1-бөлүгү боюнча эки протокол түзүшкөн.
• "Борсан Констракшн", "Аю Премиум Строй", "Делюр” компанияларына КР Укук бузуулар жөнүндө кодексинин 114, 115-беренелери боюнча айып протоколу жазылган.