Бишкекте биринчи жолу кабаттуу унаа токтотуучу жай орнотулууда

Борбор калаада алгачкы ротордук унаа токтотуучу жай орнотулууда.

Мэриядан билдиришкендей, Орто-Сай базарынын аймагында «Муниципалдык унаа токтоочу жай, унаа токтоочу жайлар жана базарлар» муниципалдык ишканасынын адистери «Могилевлифтмаш» ААКнын өкүлдөрү менен биргеликте 10 унаа токтотуучу жайга конструкцияны монтаждоо иштерин жүргүзүүдө. 

Бишкек шаарынын мэри Айбек Жунушалиев курулуп жаткан унаа токтотуучу жайдын орнотулушу менен таанышып, аталган жай тесттик режимден соң ишке берилерин айтты.

Мындан тышкары, калаа башчысы базардын аймагындагы 252 унаага эсептелген жер төлөсү бар көп деңгээлдүү унаа токтотуучу жайдын курулушунун жүрүшүн текшерип, курулуш иштерин ушул жайга бүтүрүү пландалганын белгиледи.

Белгиленгендей, Бишкек шаарынын мэриясы унаа токтотуучу жайлардын ар кандай түрлөрүн караштырууда. Жетиштүү орундары бар аймактарда көп деңгээлдүү унаа токтотуучу жайлар пландаштырылат, ал эми бош орундары чектелген жерлерде ротордук унаа токтотуучу системаларын орнотууну пландоодо.

"Бул долбоорлорду ишке ашыруу борбордогу унаа токтотуучу жайлардын абалын бир топ жакшыртат",-деп айтылат маалыматта.