Бишкекте электр чубалгыларын жердин асты менен тартуу пландалууда

Бишкекте электр чубалгыларын жердин асты менен тартуу пландалууда. Мэрия ал үчүн "Таза асман — 2030" концепциясын иштеп чыккан.

Буга чейин кабелдерди жер астына жайгаштыруу "Кыргызтелеком" ишканасы, интернет-провайдерлер жана уюлдук байланыш операторлору менен макулдашылган.

Учурда айрым участоктордо жер астында инфраструктура жок экени белгиленген. Мындан улам Бишкек шаардык телефон тармагы (БШТТ) жергиликтүү бюджеттин эсебинен кабелдик канализацияны куруу боюнча кайрылган. Ага ылайык, инфраструктура курулса БШТТ ишканасы интернет-провайдерлер менен келишим түзүп, кабелдик канализациянын жерин ижарага берет. Түшкөн пайданын жарымы мэрияга которулат.

Жалпысынан 30,24 миллион сомго 6 көчөдө узундугу 7,81 чакырым кабелдик канализация куруу каралууда. Мэрия бул каражатты ижара акысынан кайтарууга белсенүүдө. Кабелдин бир чакырымы үчүн 800-1000 сом төлөнөрү күтүлүүдө.

Концепцияны ишке ашыруу этаптары:

- даярдык (2026-жылга чейин) — учурдагы абалды талдоо, пландоо, операторлор менен макулдашуулар;

- ишке ашыруу (2026-2029-жылдар) — жер астындагы кабель түйүндөрүн куруу, аба чубалгыларын демонтаждоо;

- жыйынтыктоо (2030-жыл) — объектилерди муниципалдык менчикке өткөрүү, шаардык бюджетке интеграциялоо.

Токтом долбоору Бишкек шаардык кеңештин кароосуна киргизилди.