Бишкекте куран окутуу, кыз узатуу өткөрүп жаткан бир нече тойканаларга айып салынды

Бишкек шаарынын Ленин райондук Санитардык-экологиялык инспекциясынын инспекторлору Covid-19 коопсуздук эрежесин бузгандарды аныктады. Бул тууралуу мэриянын басма сөз кызматы билдирди.

Маалыматка караганда, «Алтынай» ресторанында массалык иш-чаралардын, тойлордун жана үй-бүлөлүк майрамдардын өткөрүүгө тыюу салынганына карабастан той өткөрүлүп жаткандыгы аныкталды. 

Ресторандын администрациясына КРнын Бузуулар жөнүндө кодексинин 293-беренеси боюнча протокол түзүлдү. Ушул эле берене боюнча "Сары-Өзөн" жана  Guzel Grand Hall, «Сары-Челек» ресторандарынын администрацияларына протокол түзүлдү. Аталган жайларда «куран окутуу», ошондой эле, «Сары-Челек» ресторанында «кыз узатуу» иш-чаралары өткөрүлгөн.

Мындан тышкары, Чүй проспектиси жана Исанов көчөлөрүнүн кесилишиндеги «Бир Эки», «Лагман», «Фрешбокс» тез тамактануу жайларында дагы санитардык нормалар бузулганы аныкталган. Аларга карата протоколдор түзүлдү.