Бишкектеги ЖЭБ-2 объектисинин курулушу башталып, заманбап газ станциясы курулат

Бишкек шаарындагы ЖЭБ-2 объектисинин курулушу башталып, заманбап газ станциясы курулат. Бул тууралуу Бишкек шаарынын мэринин орун басары Таалайбек Байгазиев “Ала-Тоо 24” телеканалына билдирди. 

Анын айтымында, ушул жылдын апрель айынан баштап суу менен камсыздоо боюнча скважинаны бургулоо иштери башталып, газ тартылып, трасса даярдалат. 

“Бишкек ЖЭБ-2де 250 МВт кубаттуулуктагы газ куюучу станцияны куруу долбоору боюнча инвесторлор менен сүйлөшүүлөр жүрүп, макулдашууга кол коюлган. Мында узундугу 10 км ашык газ өткөргүч, жылуулук жеткирген трасса курулат. Негизгиси ЖЭБ-2 объектиси ишке кирсе калааны электр жана жылуулук энергиясы менен камсыздоо жакшырып, Бишкек ЖЭБдин шаарды жылытуу боюнча жүгүн жеңилдетет. Шаардагы жаңы салынып жаткан турак-жайларды жылуулук менен камсыздоого мүмкүнчүлүк түзүлөт. Бүгүнкү күндө Бишкекте керектелүүчү кубаттулук 850, 900, 950 МВт болуп жатса, Бишкек ЖЭБ болгону 450 МВт кубаттулук менен камсыздайт. Калганы 450 МВт Токтогул суу сактагычынан, Токтогул ГЭСинен, каскаддардан же импорттолуп келип жатат”, - деди Таалайбек Байгазиев.

Белгилей кетсек, инфраструктураны жакшырткан стратегиялык долбоор Бишкектин энергетикалык дараметин арттыруу менен экологиялык жагдайдын оңолушуна өбөлгө болот. Газ станциясы 2027-жылы пайдаланууга берилет деп пландалууда. 

Энергетика министрлиги маалымдагандай, долбоордун бюджети 443 миллион АКШ долларын түзөт. Курулуш аяктап ишке берилсе, калкты жана ишканаларды электр жана жылуулук энергиясы менен туруктуу камсыз кылууга, энергетика системасынын ишенимдүүлүгүн жогорулатууга, экологиялык абалды жакшыртууга мүмкүндүк берет.

Эскерте кетсек, ЖЭБ-2 объектиси иштебей турганына 30 жылдан ашкан. Ал 1992-жылы ишке берилип, бирок ошол эле жылы кайра токтогон. Буга газ менен камсыздоо үзгүлтүккө учурап, курулуштун толук бүтпөй калышы себеп болгон.