Бишкектеги документи жок конуштарда 8,5 миңдей үй-бүлө жашайт, жарымынын турмушу оор

Ички миграциялык процесстер иш жүзүндө бардык облустардын аймагында административдик-аймактык бирдик статусуна ээ болбогон жаңы конуштарда жашаган үй-бүлөлөрдүн бар экендигине алып келди. Бул тууралуу депутат Курманкул Зулушев ЖК жыйынында айтты.

Анын маалыматында, Бишкек шаарынын айланасындагы 15ке жакын административдик-аймактык бирдик статусуна ээ болбогон өз алдынча уюшулган жаңы конуштарда алдын ала маалыматтар боюнча 8,5 миңге жакын үй-бүлө жашайт жана алардын 50%га жакыны турмуштук оор кырдаалдагы үй-бүлөлөр.

Мындан тышкары, дача участкаларындагы тургундар каттоого турган эмес. Бул жагдай жакыр жашаган үй-бүлөлөрдү мамлекеттик жөлөкпул алуу мүмкүнчүлүгүнөн ажыратат, деди Курманкул Зулушев.

Андан сырткары, депутат мыйзам долбоору аркылуу ата-энеси белгисиз болгон балдарга ай сайын жөлөк пул чегерүү сунушталып жатканын белгилеп, "ата-энеси белгисиз болгон балдар көпчүлүк учурда интернат тибиндеги балдар мекемелеринде тарбияланат. Азыркы учурда, 42 ата-энеси белгисиз болгон балдардын ичинен 40 бала балдар мекемелеринде тарбияланып жатат жана 2 бала камкордукка алынган", - деди.

Тилекке каршы алар социалдык төлөм албайт. Ал эми аларга ай сайын 2 миң сомдон жөлөк пул берсек, жалпы 84 миң сом гана керектелет, - деди депутат.