Бишкектеги стационарларда каза болгондор катталган жок, - мэрия

Бишкек шаарындагы стационарларда кезек күткөндөр азайып, акыркы күндөрү каза болгондор катталган жок, деп билдирди Бишкек шаардык мэриясынын басма сөз кызматы.

Алардын маалыматы боюнча, өткөн суткада күндүзгү стационарлар 2 миң 638 адамды кабыл алды, анын ичинен 1871 адам инфузиялык терапия, 756 адам медициналык кеңеш алып, 11 адам ооруканага жаткырылды. Мурдагы күнү 2905 адам кайрылган.

23-июлдан 24-июлга караган түнү түнкү стационарларга 517 адам кайрылды.

Жалпысынан 24-июлга карата күндүзгү стационарлар 65 миң 768 адамды кабыл алып, 341 адам ооруканага жаткырылды. 15-июлдан 24-июлга чейин түнкү стационарларга 5 миң 416 адам кайрылган жана 18 адам ооруканага жаткырылды.

“Бактыга жараша, акыркы күндөрү стационарларда каза болгондор катталган жок. Дарыгерлер Саламаттыкты сактоо министрлигинин covid-19 илдетин дарылоо алгоритмине ылайык иштеп жатышат”, - деп кошумчалады мэрия.