Бишкектин Айтматов проспектисине клен отургузулуп, веложолдор курулат

Быйыл Чыңгыз Айтматов проспектисин бойлото 50 жылдан ашык өскөн эски дарактардын ордуна жаңы көчөттөр отургузулат. 

Муниципалитеттен билдиришкендей, 22-февралда андагы ийне жалбырактуу дарактар борбор калаанын төрт района көчүрүлүп отургузулду.

Жалпысынан «Бишкек жашыл курулуш» муниципалдык ишканасынын адистери 250 ийне жалбырактуу дарактын 50сүн «Адинай» сейил багына, калгандарын шаардын төрт районуна бөлүштүрдү:

- Ленин районундагы «Ата-Бейит» улуттук тарыхый-мемориалдык комплексинин аймагына 40 түп, №102 мектептин аймагына 10 түп арча отургузулду;

- Октябрь районундагы №57 бала бакчага жана №112 мектепке 50 түп көчөт отургузулду;

- Свердлов району боюнча Кыргыз көчөсүнүн боюна 50түп дарактар отургузулган;

- Биринчи май районунда №108 мектептин айланасына ийне жалбырактуу дарактар отургузулду.

Белгилей кетсек, учурда Ч.Айтматов проспектисинин боюндагы жашыл аймактарды жакшыртуу иштери, ошондой эле веложолду куруу пландаштырылууда.