Быйыл мектептердеги окуу китептеринин ижара акысы 25 сомду түзөт

Быйыл мектептердеги окуу китептеринин ижара акысы былтыркыдай эле 25 сом өлчөмүндө болот. Бул тууралуу Билим берүү жана илим министрлигинен билдиришти.

Маалыматка ылайык, окуу китеби үчүн ижара акысын 2023-жылдын 31-декабрына чейин төлөө керек. Окуу китебинин ижара акысынын өлчөмү бир окуу китебинин баасы 125 сом болуп турганда белгиленген.

"Мектептерде окуу китептеринин ижара акысын киргизүү жаңы китептерди сатып алууга шарт түзө турганын кошумчалайт. Жаңы окуу жылында ижара акысын көтөрүү пландалган эмес. Келечекте окуу китептерине болгон баанын жогорулашы менен ижара акысынын өлчөмү жогорулатылышы мүмкүн", - деп айтылат маалыматта.

Ошондой эле министрлик быйылкы жылы төмөнкү китептерди басып чыгаруу пландалып жатканын кошумчалайт.

- башталгыч класстары үчүн “Мен жана дүйнө”, “Кыргыз тили”, “Адабий окуу”;

- 7-8-класстар үчүн “Адам жана коом” окуу китептерин басып чыгаруу пландалууда.

Министрлик ошондой эле окуу китептерин басып чыгарууга лицензия алуу үчүн Кембриж жана Оксфорд университеттеринин басмаканалары менен да сүйлөшүүлөрдү жүргүзүүдө.

“Окуу китеби” республикалык илимий-практикалык борбору бир катар басмалар тарабынан иштелип чыккан окуу китептерине экспертиза жүргүзүүдө.

Окуу китептери басылып чыккандан кийин электрондук версиялары Билим берүү жана илим министрлигинин Электрондук китепканасына жайгаштырылат. Министрлик жыл сайын окуу жылы башталгандан кийин окуу китептеринин жетишсиздигин аныктоо үчүн мектептердин окуу фондуна инвентаризация жүргүзөт.