Борбор калаада эки айлык ишембилик жарыяланды

Борбор калаада 15-марттан 17-майга чейин көрктөндүрүү, санитардык тазалоо жана жашылдандыруу боюнча эки айлык жарыяланды. Бул тууралуу мэриядан билдиришти. 

Маалыматка ылайык, менчигинин түрүнө карабастан уюмдар жана мекемелер, ошондой эле көп кабаттуу үйлөрдө жана жеке турак жайларда жашаган жарандар ишембиликтин алкагында көчөлөрдү тазалоого жана көрктөндүрүү иштерине катышууга чакырылды.

2025-2026-жылдарга Бишкек шаарын көрктөндүрүү жана жашылдандыруу боюнча иш-чараларды даярдоо жана өткөрүү боюнча штаб түзүлүп, Бишкек шаарынын мэриясына караштуу аймактык бөлүмдөргө жана чарба жүргүзүүчү субъекттерге күчөтүлгөн режимде ишти уюштуруу тапшырылды.

Административдик райондордун башчыларына МАБ менен биргеликте бардыгына бөлүнгөн аймактар, анын ичинде ААР алкагында кошулган жаңы аймактар менен тааныштыруу тапшырмасы берилди.

Муну менен катар Муниципалдык инспекцияга жана шаардык чарба департаментине бекитилген аймактардын абалына үзгүлтүксүз мониторинг жүргүзүүнү камсыз кылуу милдеттендирилди.

"Бишкекжашылкурулуш" муниципалдык ишканасына жалбырактарды, бутактарды өз убагында алуу, бак-дарактарды отургузуу жана ирригациялык тармактарды тазалоо иштерин уюштуруу, ал эми "Тазалык" ишканасына шаар көчөлөрүн тазалоонун сапатына көзөмөлдү күчөтүү тапшырылды.

Мындан тышкары, шаардагы сейил бактарды, скверлерди, бульварларды, эс алуу жайларын өз убагында санитардык тазалоо жана талаптагыдай кароо, ишембиликтен кийин таштандыларды, жалбырактарды, бутактарды чыгаруу тапшырмасы берилди.

Белгилей кетсек,Муниципалдык инспекция мекеме-уюмдардын жанаша жайгашкан, белгиленген жана бекитилген аймактарды тазалоо иштерине көзөмөл жүргүзөт. Ишембиликке катышпаган жарандарга (менчигинин түрүнө карабастан) карата Кыргыз Республикасынын "Укук бузуулар жөнүндө" Кодексинин 434-беренесинин 1-пунктуна ылайык айып салат.

"Урматтуу шаар тургундары, ишкерлер! Бишкек шаарынын мэриясы бардыгын борбор калааны көрктөндүрүү жана жашылдандыруу боюнча иш-чараларга катышууга чакырат!",-деп айтылат маалыматта.