КР Чек ара кызматы Лейлек районунун Ак-Арык айылында жергиликтүү тургун тарабынан тартылган видео материал боюнча түшүндүрмө берди. Бул тууралуу Чек ара кызматынын басма сөз кызматы кабарлады.
Маалым болгондой, жергиликтүү тургун "тажик жарандары чөптү чаап кетти, чек арачылар чара көрбөйт" деген негизде маалымат тараткан.
Аталган видеодогу маалымат чындыкка толугу менен дал келбейт. Кыргыз-тажик чек арасы токтоосуз көзөмөлдө жана чек ара күнү-түнү заманбап жабдыктар менен көзөмөлгө алынууда.
Чек ара кызматы видеого тарткан жарандын өздүгүн тастыктап, андан видео боюнча сураганда эч кандай далил келтире алган эмес.
Чек ара кызматы Кыргыз Республикасынын жарандарынан чек арадагы абалды курчутпоого жана дүрбөлөңгө алдырбоого чакырат.
Пикирлер (0)
Пикир жок. Сиз биринчилерден болушуңуз мүмкүн