Чек ара окуясынан 15 адам жаракат алган, экөө оор абалда, - Министрлик

Баткен облусунун Кадамжай ройонунда Кыргызстан менен Өзбекстандын жарандарынын ортосундагы чек ара чырынан 15 адам жаракат алды. Бул тууралуу Саламаттыкты сактоо министрлигинен билдиришти.

Алдын ала маалыматтар боюнча, Айдаркен шаарынын Жалпы дарыгерлик тажрыйбалык борборуна жаракат алган 15 жабырлануучу келип түшкөн. Учурда алардын төртөөсү ооруканада, калгандары алгачкы жардам көрсөтүлгөндөн кийин амбулатордук дарыланууга чыгарылган.

“Ар кандай жаракаттары бар 4 жабырлануучу ооруканада дарыланып жатышат, экөөнүн абалы оор деп бааланууда, ал эми калган экөө салыштырмалуу канааттандырарлык абалда”, - деп билдирди министрлик.

Жабыр тарткандар бардык керектүү дары-дармектер жана медициналык багыттагы буюмдар менен камсыз болушкан.

Окуя болгон жерде 2 тез жардам бригадасы нөөмөттө турушат. Баткендеги кесиптештерине жардам көрсөтүү үчүн облустук саламаттыкты сактоо координатору жетектеген реаниматолог жана травматолог жөнөтүлдү.