Баткендин Лейлек районунун чек арачылары 20-ноябрда аткезчилик жүктөрдү мыйзамсыз алып өтүү аракетине бөгөт коюшту. Бул тууралуу Улуттук коопсуздук мамлекеттик комитетинин Чек ара кызматынын ЖМК жана коомчулук менен байланыш түзүү бөлүмү билдирди.
Лейлек районуна караштуу Маргун-Арка автоунаа жолунда чек арачылар 30 жаштагы Р.С. аттуу кыргызстандык башкарып келе жаткан “Мерседес-Бенц Спринтер” үлгүсүндөгү автоунаасын токтотууга аракет кылышкан. Бирок айдоочу баш ийбей унааны токтоткон эмес.
“Чек арачылар асманга эскертүү иретинде ок чыгарып, аргасыздан автоунааны токтотуу максатында унаанын дөңгөлөгүн көздөй ок чыгарган”, - деп айтылат маалыматта.
Транспорт каражатын текшерүү учурунда 1 миң кг ашуун таттуулар (конфет) аныкталып, айдоочуда жүккө тиешелүү документтери болгон эмес. Ал жүктөрдү Кыргызстандан Тажикстанга алып өтүүгө аракет кылган.
Тиешелүү иш-кагаздары толтурулгандан соң кармалган айдоочу жана жүк мындан ары териштирүү иштерин жүргүзүү үчүн компетентүү органдын кызматкерлерине өткөрүлүп берилди.
Пикирлер (0)
Пикир жок. Сиз биринчилерден болушуңуз мүмкүн