«Чындык» сайтынын редактору бошотулду

20-январда «Чындык» сайтынын редактору Турсунбек Бейшенбеков жашыруун документтерди жарыялагандыгы үчүн 48 саатка кармалган. Бүгүн, 21-январда ал үй камагына чыгарылганы белгилүү болду. Бул маалыматты “24.kg” маалымат агенттиги күч структураларындагы ишенимдүү булактарына таянуу менен маалымдады.

Аталган журналист буга чейин эки ирет Аскер прокуратурасында суракка алынган.Т.Бейшенбеков вице-премьер-министр Жеңиш Разаковдун, анын Тажикстандын атайын кызматтарына тиешеси барлыгы жөнүндө имиш сөздөр боюнча жазган түшүнүк катын жарыялап жибергенге айыпталганы кабарланган. Айрым маалыматтар боюнча ага бул маалыматты Ички иштер министринин мурдагы орун басары Курсан Асанов берген.