Чүй облусунун Кашка-Суу айылындагы 30 гектардан ашык жерге Кыргыз-Россия Славян университетинин (КРСУ) жаңы кампусун куруу пландалып жатат. Күн мурун Россиядан келген делегация кампус курула турган жерди көрүп чыкты. Бул тууралуу маалымат окуу жайдын фейсбуктагы расмий баракчасына жарыяланды.
Кампустун долбоорунун негизги параметрлери:
Жайгашкан жери: Чүй облусунун Кашка-Суу айылындагы перспективдүү район;
Жалпы аянты: 30 гектардан ашык;
Стандарттарга ылайык келүүсү: кампустун дизайны дүйнөлүк жогорку билим берүү стандарттарын эске алуу менен жүргүзүлөт;
Ишке ашыруу мөөнөтү: РФ президенти Владимир Путиндин жарлыгына ылайык, курулушту 2030-жылга чейин аяктоо пландалган;
Каржылоо: долбоорду ишке ашыруу үчүн каражат Россиянын жана Кыргызстандын бюджеттеринде каралат.
Соода-экономикалык, илимий-техникалык жана гуманитардык кызматташтык боюнча өкмөттөр аралык Кыргыз-Россия комиссиясынын теңтөрагаларынын жолугушуусундагы талкуунун маанилүү аспектиси болуп кампустун инженердик инфраструктурасын камсыздоо чечими болду.
Министрлер кабинетинин төрагасы Адылбек Касымалиев инженердик тармактарды долбоорлоого жана курууга кеткен чыгымдарды өлкөнүн бюджетине киргизүү демилгесин колдоду.
КРСУнун ректорунун милдетин аткаруучу Сергей Волков аталган долбоордун университет жана Кыргызстандын жогорку билим берүү системасы үчүн маанилүү экендигин белгиледи.
"Жаңы кампусту куруу - бул КРСУ жана республиканын билим берүү тутуму үчүн стратегиялык милдет. Бул аянт билим берүү үчүн заманбап мейкиндик гана эмес, аймактын илимий-технологиялык жана инновациялык өнүгүүсүнүн борбору болуп, студенттер, окутуучулар жана изилдөөчүлөр үчүн жаңы мүмкүнчүлүктөрдү ачат", - деди Волков.
Пикирлер (0)
Пикир жок. Сиз биринчилерден болушуңуз мүмкүн