Бүгүн Жогорку Кеңештин жыйынында депутат Мирлан Самыйкожо жаза белгилөөдө жеңилдетүүчү жагдай катары каралган кылмыш жасагандардын жашын көтөрүүнү сунуштады.
Анын айтымында, Нарында жети жашар кызды зордуктап өлтүргөн 64 жаштагы жаран 12 жылга эркинен ажыратылды.
«Кылмыш-жаза кодексине ылайык, кылмыш жасаган учурда 60 жашка чыккан эркектерге өмүр бою эркинен ажыратуу белгиленбейт. Ал эми жогорудагы кылмышты жасаган учурда айыпталуучу 64 жашта болгон. Мыйзамга өзгөртүү киргизүү керек”, - дейт Мирлан Самыйкожо.
Эскерте кетсек, бала үстүбүздөгү жылдын 28-апрелинде өлтүрүлгөн. Сөөк кароосуз калган үйдөн табылган. Шектүү катары 64 жаштагы жергиликтүү тургун кармалган. Кармоо учурунда ал мас болгон. Кылмыш иши “Адам өлтүрүү” беренеси менен козголгон.
Пикирлер (0)
Пикир жок. Сиз биринчилерден болушуңуз мүмкүн