Депутат балдарга кыргыз тилин үйрөтүүнү бала бакчаларга милдеттендирүүнү сунуштады

Депутат Элмурза Сатыбалдиев бардык бала бакчаларды балдарга кыргыз тилин үйрөтүүгө милдеттендирүүнү сунуштады.

«Бул милдеттүү түрдө болушу керек. 3-5 жаштагы балдар тилди тез үйрөнүшөт. Азыр айылдагы балдар мультфильм көрүп, англисче сүйлөп калышты», - деди ал 19-февралда Жогорку Кеңештин Социалдык саясат боюнча комитетинин жыйынында.

«Мектеп окуучулары кыргыз тилинен сынактан өтпөй, кийинки класска которулбай калса эмне болот? Жөндөмү жоктор бар. Анан алар өмүр бою бир класста отура береби? Биз жумшак саясат жүргүзүүбүз керек, бул учурда кандай иш-аракет кылышыбыз керектигин окумуштуулар менен талкуулашыбыз керек», - деди ал.

Элмурза Сатыбалдиев бир нече айдан кийин жалпы республикалык тестирлөө тапшыра турган бүтүрүүчүлөрдүн кыргыз тилинен тест тапшырышы туура эмес деп эсептейт.

«Бул мөөнөтүнөн мурда, бир жыл, эки жыл мурун жасалышы керек. Элибиз көп улуттуу, башка улуттун өкүлдөрү бар. Бардык мөөнөттөр такталышы керек», - деди ал.

Ал белгилегендей, кыргыз тилине да, мамлекеттик тил мыйзамына да каршы эмес. «Мыйзам бар, ал иштеши керек, бирок алар кандай иштейт деген суроо бизден көз каранды», - деди депутат.