Депутат жол киренин 20 сомго көтөрүлүшүнө каршы экенин билдирди

Жогорку Кеңештин депутаты Марлен Маматалиев жол киренин 11 сомдон 20 сомго көтөрүлүшүнө каршы. Бул тууралуу ал парламенттин жыйынында билдирди.

Анын айтымында, мэрия аргумент катары Европа өлкөлөрүнүн тажрыйбасын келтирүүдө.

«Белгилей кетким келет, европалыктар үчүн орточо айлык 250 миң сом болсо, биздики 25 миң сом. Алар менен кантип салыштырууга болот? Жол кире акысын көтөрбөө үчүн электр кыймылдаткычы же газ менен иштөөчү автобустарыды сатып алууну айттык. Бирок көтөрүшсө, анда 11 сомдон 15 сомго көтөрүлсүн. Бирок 20 сомго чейин көтөрүп, түндө 25 сом кылуу туура эмес”, - дейт Марлен Маматалиев.

Белгилей кетсек, Бишкек мэриясы коомдук транспортто жол кирени 20 сомго чейин көтөрүүнү сунуштоодо. Токтом долбоору муниципалитеттин расмий сайтында жарыяланды. Менчигинин түрүнө карабастан транспорттун бардык түрлөрүнө: автобустарга, кичи автобустарга жана троллейбустарга бирдиктүү тарифти белгилөө сунушталууда.