Депутаттар Эдиль Байсаловдун отставкасын талап кылышууда

Жогорку Кеңештин депутаттары министрлер кабинетинин төрагасынын орун басары Эдил Байсаловдун билдирүүсүнө нааразы.

Парламенттин 21-июндагы жыйынында Мирлан Самойкожо президенттин Жогорку Кеңештеги өкүлү Алмасбек Абытовго кайрылып, Жогорку Кеңеш эмне экенин жана Конституцияга ылайык, депутаттарга кандай функциялар жүктөлөрүн айтып берүүнү суранды.

"Депутаттар кимдин атынан сүйлөй алат жана сүйлөй албайт? Бизди ким шайлады, кандай укуктарыбыз бар?" - деп сурады.

Спикер Нурланбек Шакиев белгилегендей, Байсаловдун социалдык комитеттин жыйынында жана жыйындан кийинки маектешүү учурунда айткан сөздөрүнө баа берилет.

"Биз бул маселени көңүл сыртында калтырбайбыз. Мен министрлер кабинетинин башчысы Акылбек Үсөнбековичке конкреттүү тапшырмаларды бердим. Бул биринчи жолу эмес. Министрлер кабинетинин төрагасынын орун басары бийликтин мыйзам чыгаруу жана аткаруу бутактарынын ортосунда келишпестиктерди жаратууда. Ал ушундай ойлонулбаган, жоопкерсиз сөздөрү үчүн жооп бериши керек. Мен бүгүн президент менен сүйлөшөм. Парламентке жана анын аброюна шек келтирген сөздөрдү айтууга Министрлер кабинетинин жетекчилиги да, анын мүчөлөрү да укугу жок. Биз жол бербейбиз. Жогорку Кеңеш өзүнүн тапшырмаларынын аткарылышын Министрлер Кабинетинин алдында талап кылууга укуктуу.

Байсаловго байланыштуу маселени карайбыз. Керек болсо анын кызматка ылайыктуулугун талкуулайбыз. Убакыт келди деп ойлойм", - деди ал.

Абытов өз кезегинде элдин атынан сүйлөөгө депутаттар дагы, президент дагы укуктуу экенин белгиледи.

Эрулан Кокулов Шакиевден Байсаловдун отставкасы боюнча маселени президент менен талкуулоону өтүндү. "Ал отставкага кетиши керек!", - деп кошумчалады депутат.

Эске салсак, Байсалов бир күн мурун, 20-июнда министрлер кабинетин түзгөн президент элдин атынан сүйлөй аларын, парламенттин чечимдери кеңеш берүүчү мүнөздө экенин айткан.