Жогорку Кеңештин жыйынында депутат Балбак Түлөбаев билим берүү жана илим министри Догдуркүл Кендирбаевага 12 жылдык билим берүүгө өтүү боюнча суроо узатты.
Анын айтымында, Улуттук коопсуздук боюнча мамлекеттик комитеттин башчысы Камчыбек Ташиев менен министрлер кабинети жаңычылдык боюнча өз пикирлерин билдиришип, 12 жылдык билим берүүгө дагы акырындык менен өтүү зарылдыгын айтышкан.
Эскерте кетсек, УКМКнын төрагасы Кыргызстанда билим берүү тармагы начарлап кеткен, андыктан бул көйгөй чечилмейинче билим берүүнүн жаңы формасына өтүүнүн зарылчылыгы жок деп эсептейт.
«Президенттин же чет мамлекеттердин буйругун аткарып жатасызбы?», — деп сурады эл депутаты агартуу министринен.
Догдуркүл Кендирбаева бул мамлекет башчынын буйругу экенин жана бир дагы чет мамлекет Кыргыз Республикасынын 12 жылдык билим берүүгө өтүүсүнө эксперт катары да, инвестор катары да катышпай жатканын айтты.
Өз кезегинде Садыр Жапаров бардык тобокелчиликтерди эске алуу менен 12 жылдык окууга өтүүнү этап менен ишке ашырууну чечкен.
Эске сала кетсек, 2025/26-окуу жылына бир катар инновациялар пландалууда. Анын ичинде кээ бир окуучулар классты аттай алышат, ал эми мектепке чейинки даярдоону аяктаган балдар түз эле экинчи класска кабыл алынат.
Пикирлер (0)
Пикир жок. Сиз биринчилерден болушуңуз мүмкүн