Дүйнө чемпионатында кызыктар уланууда. Марокко менен Япония тайпадан биринчи болуп чыкса, Бельгия менен Германия турнир менен коштошту

1-декабрда футбол боюнча дүйнө чемпионатынын тайпалык баскычтагы акыркы беттештери өттү.

Е тайпасында Германия курамасы Коста-Рикага каршы беттеш өткөрдү. Германия бул оюнда 1:2 эсебинде артта калганына карабай, эсепти 4:2ге айлантты. Бирок Германия үчүн бул жеңиш дүйнө чемпионаты менен коштошуудан башка эч нерсе алып келген жок.

Анткени удаа оюнда Испанияны Япония 2:1 эсебинде жеңип, тайпалык баскычта 6 упай топтоп 1/8 финалга жолдомо алды.

Ал эми Германия менен Испания 4төн упай топтогон. 

Испания голдордун айырмасы менен кийинки баскычка чыкты.

F тайпасындагы командалар да кызыктуу оюн тартуулады.

Бельгия тайпадан чыгыш үчүн Хорватияны жеңүүгө мажбур болгон. Бирок хорватиялыктар өзүнүн стилинде оюнду өткөрүп гол өткөргөн да киргизген да жок. Эсеп 0:0. Бул эсеп Хорватиянын кийинки баскычка чыгуусу үчүн жетиштүү болду.

Мындан улам Бельгия курамасы тайпада 3-орунду ээлеп, турнир менен кош айтышты.

Удаа оюнда Марокко дагы бир жолу сенсация жаратып, Канаданы 2:1 эсебинде утту. 

Марокко бул дүйнө чемпионатында тайпадан 7 упай менен 1-орунду ээлеп, 1/8 финалга чыкты.

1/8 финалда Е тайпасынан 1-орунду ээлеген Япония менен Хорватия жана Марокко менен Испания беттешет.