Дүйнөлүк көчмөндөр оюндарында көкпар боюнча мелдештин финалисттери аныкталды

Астанада өтүп жаткан Дүйнөлүк көчмөндөр оюндарында көкпар боюнча мелдештин финалисттери аныкталды.

Медалдар үчүн жалпысынан 9 команда ат салышты.

Кыргыз курама командасы мелдешти 1/4 финалдык баскычтан баштап, Монголия менен беттешип, 16:0 эсебинде жеңишке жетти. Жарым финалда кыргызстандыктар Түркияны 15:1 эсебинде жеңип, финалга чыкты.

Экинчи финалист 1/8 финалдык баскычтан баштаган Казакстан курамасы болду. Турнирдин кожоюндары алгач Өзбекстанды 16:0 эсебинде жеңип, чейрек финалда 12:4 эсебинде АКШдан күчтүү болгон.

11-сентябрда жарым финалда Казакстандын курама командасы Орусия менен беттешип, 18:2 эсебинде жеңишке жеткен.

Кыргызстан менен Казакстандын курама командаларынын финалдык оюну 12-сентябрда Бишкек убактысы боюнча саат 12:00дө башталат.