Бул жылы Эл аралык Менделеев олимпиадасына Кыргызстандан 4 окуучу катышып, алардын үчөө медалдарга ээ болушту. Бул тууралуу билим берүү жана илим министринин орун басары Надира Жусупбекова 21-июлдагы брифингде билдирди.
Анын айтымында, бул жылы Эл аралык Менделеев олимпиадасы Будапешт шаарында (Венгрияда) өткөрүлмөк. Пандемияга байланыштуу олимпиада онлайн форматта өткөрүлдү.
"Олимпиадага 20дан ашык өлкөнүн мектеп окуучулары катыша алышты. Кыргызстандан 4 окуучу катышып, Каракол шаарындагы К.Карасаев атындагы Ысык-Кѳл лицейинин окуучулары медалдарга ээ болушту.
Алсак, 10-класстын окуучусу Соодонбеков Нурсултан – 2-орунга ээ болуп, күмүш медаль алды. Ал эми Кубанычбек Камиль 3-орунду алып, коло медалга ээ болду. Ал эми Ч.Айтматов атындагы Бишкек лицейинин 10-классынын окуучусу Мамбетов Камил коло медалына ээ болду", - деди ал.
Эл аралык Менделеев олимпиадасы - химия предмети боюнча жылына өтүлүп, КМШ, Балтика, Түштүк Чыгыш Европа өлкөлөрүнүн мектеп окуучулары катышышат.
Пикирлер (0)
Пикир жок. Сиз биринчилерден болушуңуз мүмкүн