Элдик курултайда делегаттардын ыйгарым укуктарын үч жылга узартуу сунушталды

Элдик Курултайдын делегаты Болотбек Алибеков аларды үч жылга шайлоону сунуштады. Бул тууралуу ал катышуучулар алдында сүйлөп жатып билдирди.

Мындан тышкары Болотбек Алибеков дагы бир катар маселелерди көтөрдү. Милдеттүү аскердик кызматка жалаң кыргыз жигиттери барганына нааразы болду.

«Кыргызстанда 80ден ашуун ар улуттун өкүлдөрү жашайт, бирок эмнегедир бир гана кыргыздар аскерге барышат. Эмне үчүн башка улуттар кызмат кылбайт?» — деп сурады делегат.

Ал ошондой эле абактарды чарбалык эсепке которууну сунуш кылды. «Эмне үчүн эл кылмышкерлерди багышы керек? Ата-энеси же туугандары камсыз кылсын», - дейт Болотбек Алибеков.

Ал президентти өз районуна чакырды. «Мен Чаткал районунан болом. Аймактын көйгөйлөрүн өз көзүңүз менен көрүү үчүн бул аймакка барып келүүнү суранам», - деди делегат.