Эмил Жамгырчиев УКМК аны издегени үчүн ыраазычылык билдирди

Жогорку Кеңештин депутаты Эмил Жамгырчиев бүгүн, 11-январда жумушка чыгып, маалымат каражаттарына буга чейин кайда болгонун айтып берди. 

Ал атасынын ооруганына жана ошол убакта өзү да ооруп калганына байланыштуу акысыз өргүү алганын айтты. Ал эми УКМК ага издөө жарыялаганы алардын милдети экенин баса белгиледи.  

“Бул УКМК кызматкерлеринин түздөн-түз милдети. Себеби ар бир жаран жок болуп кетсе, издөөгө тийиш. Ал үчүн ыраазычылык айтыш керек. Эл өкүлүнө сарсанаа болуп издөө жарыялаганына ыраазымын. Бирок ошол эле маалда мен Бишкекте жүргөнүм тууралуу маалымат бергем”,-деди Жамгырчиев. 

Журналисттер буга чейин депутат Жанар Акаев айтып жаткан үн жвздыруучу аппараттар тууралуу сурашты. Жамгырчиев анын үйүнөн жана унаасынан үн жаздыруучу аппараттардын табылганын тастыктады. Учурда ал боюнча тергөө иштери жүрүп жатканын кошумчалады.