Эртеңден тарта «Унаа» мекемесинин Бишкектеги батыш бөлүмү ишин токтотот

15-марттан тарта «Унаа» мамлекеттик мекемесинин Бишкектеги батыш бөлүмү ишин токтотот.

Мекемеден билдиришкендей, аталган бөлүмдүн кеңсеси жайгкашкан Алыкулов көчөсү, 3/10 дарегиндеги имарат реконструкцияга жабылды. Мындан улам ижара келишими бузулган.

«Унаа» мекемеси Бишкек шаары жана Чүй облусу боюнча бөлүмдөрүндө кезек күтүүнүн алдын алуу максатында 16-марттан баштап пилоттук режимде төмөнкү бөлүмдөрдү жети күндүк иш тартибине өткөрөт:

• Бишкек шаары, Элебесов көчөсү, 206 дарегинде жайгашкан Аламүдүн бөлүмү;
• Таш-Дөбө айылы, Больничная көчөсү, 41 дарегинде жайгашкан Таш-Дөбө сектору;
• Шопоков шаары, Машиностроительная көчөсү, 26 дарегинде жайгашкан Сокулук-Москва бөлүмү.

Эскерте кетсек, 26-февралдан тарта Бишкек шаардык бөлүмү түшкү тыныгуусуз жети күндүк иш графигине өткөн.

Ошондой эле борбор калаанын батыш тарабынын тургундары ишембиден шаршембиге чейин саат 08:30дан 17:30га чейин “РИОМ-Авто” унаа базарынын аймагында жайгашкан аймактар ​​аралык бөлүмүнө кайрылса болот.