Евробиримдиктин Кыргызстандагы өкүлчүлүгү “Азаттыктын” иши боюнча билдирүү жасады

Европа Биримдигинин Кыргызстандагы өкүлчүлүгү “Азаттык Медианын” иши боюнча билдирүү жасады.

Билдирүүдө “Азаттык Медиага” карата киргизилген чектөөлөрдүн алынышын кубаттай турганы жана сот Маданият, маалымат, спорт жана жаштар саясаты министрлиги менен “Азаттык Медианын” ортосунда жетишилген макулдашууну жактырганын эске алары айтылат.

“Жалпыга маалымдоо каражаттарынын эркиндиги жана эркин, көз каранды эмес журналистиканы камсыз кылуу бардык динамикалуу жана туруктуу коомдор үчүн пайдубал болуп саналат”, - деп айтылат уюмдун 13-июлда жараткан билдирүүсүндө.

Белгилей кетсек, “Азаттык Медиа” сайты чек арадагы конфликт жөнүндө анык эмес маалымат камтыган материалды бардык ресурстарынан өчүрүп, соттук териштирөөлөр токтоду. Тийиштүү тынчтык келишими күн мурун, 12-июлда Бишкек шаардык соту тарабынан бекитилди. “Азаттык Медиага” карата чектөөлөр мыйзам менен белгиленген тартипте алынат.

Эске салсак, Маданият, маалымат, спорт жана жаштар саясаты министрлиги “Азаттык Медиа” сайтынын ишин убактылуу токтоткон.

Бул “Азаттык Медиа” Кыргыз Республикасынын улуттук кызыкчылыктарына каршы келген анык эмес материалды өчүрүүдөн баш тартып келгени менен шартталган (2022-жылдын 14-17-сентябрындагы окуялар тууралуу анык эмес маалыматтар).