ИИМ: Бишкекте “Хизбут-Тахрирдин” активдүү мүчөсү маңзат менен кармалды

ИИМ тарабынан Бишкекте Афган тектүү маңзат каражаттарын таратуу менен алектенип жүргөн “Хизбут-Тахрирдин” активдүү мүчөсү кармалды. Бул тууралуу аталган мекеменин басма сөз кызматы билдирди.

Маалыматка ылайык, жүргүзүлгөн тергөө-ыкчам иш-чаралардын жүрүшүндө А.Н. аттуу жаран “улуттар аралык кастыкты козутуу жана эркинен ажыратуу жайларынан качуу” беренеси боюнча мурда соттолгон Кыргыз Республикасынын аймагында тыюу салынган “Хизбут-Тахрир” диний экстремисттик уюмунун активдүү мүчөсү катары КРнын ИИМдин каттоосунда туруп, 2013-жылдан бери анын активдүү мүчөсү экендиги аныкталган.

"ИИМдин БМЖКККнын жана ИИМдин Тергөө кызматынын кызматкерлери Бишкекте ыкчам-издөө иш-чараларын жүргүзүүдө май куюучу станциялардын биринде “Хонда-Фит” үлгүсүндөгү унааны башкарган 1987-жылы туулган К. Э. жана жүргүнчү А. Н. токтотулган.

Жеке текшерип кароодо А. Н. курткасынын оң чөнтөгүнөн тунук түстөгү целлофан табылып, анда 8 даана өзгөчө жыты бар, кочкул жашыл түстөгү зат болгон. Алынган заттын салмагы таңгагы менен кошо 41 граммды түзгөн. Тинтүү учурунда Хонда-Фит автомашинасы айдоочунун отургучунун чөнтөгүнөн салмагы 2 грамм тегеректелген формадагы зат табылып, алынган. Айдоочу К.Э. жашаган жерин тинтүү учурунда кызматтык издөө иттин жардамы менен, салмагы 45 грамм болгон “гашиш” (Афган Чарс) баңги каражаттарын сактоо жайы табылды", - деп айтылат маалыматта.

Аталган факты боюнча Кыргыз Республикасынын Кылмыш-жаза кодексинин 282-беренесинде каралган кылмыштын белгилери боюнча кылмыш иши козголгон.

Экспертизанын корутундусуна ылайык, алынган заттар баңгизат болуп аныкталып, канабисса чайыры “гашиш” болгон. Шектүүлөр Бишкек шаарынын тергөө абагына киргизилди.