Илдетти аныктоочу тест-системалар боюнча маселе чечилди, - министр

Кыргызстанда бүгүнкү күндө коронавирус илдетин аныктоочу 71 миң тест-система бар, деп билдирди Саламаттыкты сактоо министри Сабиржан Абдикаримов бүгүн, 5-апрелде маалымат жыйында.

Анын айтымында, учурда 16 миң 396 тест пайдаланылган. Алардын ичинен 31 тесттен илдет аныкталып, ПЧР - анализге жиберилген, анын натыйжасында 5 учур тастыкталды.

“Мурдагы күнү ПЧР - анализ үчүн тест-системанын 5 топтому алынды. Анын бары лабораторияларга жиберилди. Алардан 1100 анализ алса болот”, - деди министр.

Анын маалыматы боюнча, бүгүн Кытайдан тест-системанын 80 топтому (набор) келээри күтүлүп жатат. Кийинки жумада Россиядан 90 топтомун сатып алууну пландап жатышат. Ошондой эле Түркиядан ПЧР-анализ үчүн дагы тест-системанын 350 топтомун күтүп жатышат. “Ушуну менен диагноз маселелери боюнча көйгөйлөрдү чечтик, деп ойлойм”, - деди Сабиржан Абдикаримов.