Илон Маск Twitterди сатып алуудан баш тартты

Миллиардер Илон Маск өзүнүн өкүлүнүн компанияга жазган катына ылайык, платформаны сатып алуу боюнча келишимден чыгып жатканын Twitter'ге кабарлады.

Тартылган документте айтылгандай, ишкер "биригүү келишимин токтотуу жана анда каралган бүтүмдөн баш тартуу" укугунан пайдаланып жатат. Бул кат расмий билдирүү экенин ишкердин өкүлдөрү баса белгилешти.

Документте "Мистер Масктын жасалма же спам Twitter аккаунттарынын чыныгы саны социалдык тармактын билдирүүсүнөн "беш пайыздан азыраак" деп айтууга негиз бар".

Миллиардердин нааразычылыгына компаниянын кадр саясаты, жакында болгон кыскартуулар жана жумушка алууну токтотуу чечими да себеп болгон, деп кошумчалашты ишкердин өкүлдөрү.

Ошондой эле платформанын жетекчилиги келишим түзүп жатканда Маскты адаштырганы, кийинчерээк "Twitter маалымат бере алган жок же андан баш тартты" деп айтылат. Ишкердин өкүлдөрүнүн айтымында, соцтармакта спам жана фейк аккаунттарды текшерүү, аларга бөгөт коюу процесси тууралуу маалымат берилген эмес. Мындан тышкары, Маск компаниянын каржылык абалы боюнча берилген материалдарга канааттанбайт, деп айтылат катта.

Маск буга чейин Twitter үчүн 44 миллиард доллар сунуштаган, бирок башка нерселер менен катар спам жөнөтүү үчүн колдонулган “фейк” аккаунттардын саны беш пайыздан ашпаганы тууралуу компаниянын маалыматтарын текшерүүнү талап кылган.