Коронавирустун экинчи толкунуна туруштук берүү үчүн адамдар денелерин күнгө күйгүзүп, ден соолугун бекемдөөсү керек, - министрлик

Коронавирустун экинчи толкунуна туруштук берүү үчүн адамдар ден соолугун бекемдеп, балдардын денелерин күнгө күйгүзүп, ден соолуктарын чыңдоосу керек. Бул тууралуу саламаттыкты сактоо министринин орун басары Нурболот Үсөнбаев 28-майдагы брифингде билдирди

“Көптөгөн окумуштуулар жана өлкөлөр коронавирустун экинчи толкуну болорун айтышууда. Биз экинчи толкунду алдын алуу, анын кесепетин азайтуу үчүн эмне кылуубуз керек? Күз-кыш мезгилдеринде тумоонун учуру келет. Тумоо да коронавирус сыяктуу дем алууну кыйындатып, COVID-19га окшош жактары бар. Мындан улам тумоого каршы эмдөөлөрдөн өткөрүүнү пландап жатабыз. Биз сиздерди бул вакциналарды колдоого жана аны активдүү алууга чакырабыз. Күз мезгилине биз чың ден соолукта болушубуз керек, балдарды да жайында күнгө күйгүзүп, ден соолуктарын бекемдөө зарыл”, - деди Үсөнбаев.