Исмаилова БУУнун өлкөлүк директору Андреа Баньоли менен жолугушту

Вице-премьер-министр Аида Исмаилова БУУ Дүйнөлүк азык-түлүк программасынын өлкөлүк директору Андреа Баньоли менен жолугушту, деп маалымдады өкмөттүн басма сөз кызматы.

Мындан мурда өкмөт жана БУУ Дүйнөлүк азык-түлүк программасынын 2018-2022-жылга Өлкөлүк стратегиялык планын ишке ашыруу үчүн өз-ара түшүнүшүү жөнүндө меморандумга кол койгон.

Беш жылдык пландын негизги багыттары катары төмөнкүлөр саналат:

- 2022-жылга карата мектептик тамактанууну жакшыртуу жана бардык мектептерди ысык тамак менен камсыздоо (учурда мектептердин 60% жакыны программа менен камтылган). Программа мектеп ашканаларын жабдууга жана кызматкерлерди даярдоого көмөк көрсөтөт;

- калктын аяр катмары арасында азык-түлүк коопсуздугу боюнча абалды жакшыртуу;  

- азык-түлүк коопсуздугун талдоо жана мониторинг жүргүзүү боюнча аналитикалык иш;

- климаттын өзгөрүүсүнө калыптануу жана жаратылыш кырсыктары тобокелдигин кыскартуу.

Азык-түлүк программасы жашыл климаттык фонддон каржылоо алган Кыргызстандагы алгачкы уюм болуп саналат.

Жолугушуунун жүрүшүндө вице-премьер-министр Аида Исмаилова БУУ тарабынан калктын социалдык жактан аяр катмарына көрсөтүлүп жаткан колдоону белгилеп, өнөктөштөргө Кыргызстандын Туруктуу өнүгүү максаттарга жетишүүсүнө кошкон салымы үчүн ыраазычылык билдирди.