Камчыбек Ташиев 12 жылдык окууга каршы экенин билдирди

12 жылдык билим берүүгө өтүү туура эмес. Мындай пикирин министрлер кабинетинин төрагасынын орун басары - Улуттук коопсуздук мамлекеттик комитетинин төрагасы Камчыбек Ташиев социалдык тармактагы баракчасы аркылуу билдирди.

Ал бул маселе окуу мөөнөтүн 12 жылга чейин узартуу боюнча жүргүзүлгөн аналитиканын негизинде жаралганын айтты.

“Биринчиден, биздеги мектептеги билим берүү өтө начарлап кетти, ушул түйшүктү чечмейинче башка системага умтулуунун кереги жок. Экинчиден, жактоочулар айтып жатышат “чет мамлекетке барып окууга ыңгайлуу болот” дешет. 

Статистиканы алып көргүлөчү болгону 3-5% гана бүтүрүүчү Европа, Америкага барып окушат экен, а калгандары КМШ мамлекеттеринде жана өз өлкөбүздө эле жогорку билим алууну улантышат. 

Финансылык, экономикалык жагынан да өтө көп зыянга учурап калабыз. 30 миңден ашык кошумча мугалим, 200дүн тегерегинде кошумча мектеп керек. Биз алдынкы мектептерди жоюп, арткы мектептерге теңеп салдык, бул да чоң көйгөй болду”, - деп белгиледи Камчыбек Ташиев.

Ошондой эле ал жогорку окуу жайлар текшерилерин, 2 жылда ал жактагы коррупция да жок кылынарын айтып өттү.

“Жогорку окуу жайда окуу жөнөкөй эле акча төлөө, зачётканы толтуруу жана кимдир бирөөлөр үчүн байлык топтоо системасына айланды. 

Университеттерге окууга барбай эле, миграцияда же чет өлкөлөрдө жүрүп эле диплом алгандар көбөйдү жана бул көрүнүш бардык жогорку окуу жайларда кездешип жатат. Университетти 200 студент диплом албаса да, таза жакшы эмгеги менен билим алган 20 студент диплом алса, мамлекет үчүн алда канча пайдалуу эмеспи! Дагы бир жолу бардык жогорку окуу жайлардын жетекчилерине эскертип кетемин, ар бир жогорку окуу жайды текшерүүгө жетишебиз, жакынкы 2 жылда коррупциясы жок мамлекетке айланабыз. Баарыбыз чогуу аракет жасашыбыз керек”, - деди УКМК төрагасы.