Камила Талиева кыргыздарды крокодилдер деген дипломатка чара көрүүгө чакырды

Бүгүн, 31-майда Жогорку Кеңештин жыйынында депутат Камила Талиева "Дипломат ири эл аралык иш-чарада кыргыз элин шылдыңдады" деп билдирди.

Анын айтымында, ал эч качан ушак-айыңга, ички чыр-чатакка аралашкан эмес жана кайсы бир улутту бөлүп көрсөтпөгөн, бирок бүгүнкү жыйында мамлекеттик тил боюнча мыйзам долбоору кабыл алынаарына байланыштуу ызы-чуу тууралуу сөз кылууну туура көргөн.

"Дипломат, профессор, тарых илимдеринин кандидаты, Тышкы иштер министрлигинин алдындагы Дипломатиялык академиянын бөлүм башчысы Айнур Жоробекова эл аралык конференцияга катышып жатып, кыргыз элин шылдыңдады. Ал жерде: 

"Мен жалпыга маалымдоо каражаттарынын эсебинен бүтүндөй Борбор Азия үчүн сүйлөй албайм. Бирок бизде негизги мыйзамда орус тили расмий тил катары жазылган. Кыргыз жана орус тилдериндеги мектептердин саны дээрлик бирдей. Университеттер да орус тилинде окутуп, улуттук крокодилдерге каршы чыгып жатышат".

Ал "улуттук крокодилдер" дейт. Башкача айтканда, дипломат крокодилдерди Нарын дарыясынан эмес, кыргыз элинин арасынан тапкан. Көрсө, адамдар крокодилдер экен", - деди Талиева.

Депутат Жоробекова ЖОЖдо сабак бере албай калышын эле эмес, жоопко тартылышы керек деп эсептейт.

Ал эми парламент төрагасы Нурлан Шакиев бул иш боюнча буга чейин жооп бергенин айтып, текшерүү жүргүзүүнү суранган. "Башкаларга сабак болушу үчүн ал катуу жазаланышы керек" деп кошумчалады ал.