Кара-Көлдө дарыяга тушүп кеткен адамдын өздүгү аныкталды (фото)

Кара-Көл шаарындагы Кара-Суу дарыясына агып кеткен адамдын өздүгү такталды. Бул тууралуу Өзгөчө кырдаалдар министрлигинин Кара-Көл шаардык бөлүмүнөн билдиришти.

Маалыматка ылайык, ал Карак-Көл шаарынын 31 жаштагы Н.Н. аттуу тургуну экени аныкталган. Анын атасы Д.Г. милицияга кайрылып, баласы 2 досунун көз алдында Кара-Суу дарыясына секирип түшүп кеткен боюнча чыкпай калганын, шериктери аны күтүп отуруп чыкпаган соң үйүнө кетип калгышканын билдиришкен.

Ал эми учурда издөө иштерине 10 куткаруучу жана 5 милиция кызматкери тартылганы айтылат.

Буга чейин 14-июнь күнү саат 12:43 чамасында Жалал-Абад облусунун Кара-Көл шаарында Кара-Суу дарыясына эркек адам түшүп кеткендиги айтылган.