Казакстан өлүм жазасын жокко чыгарды

Казакстан өлүм жазасын алып салган эл аралык протоколго кошулду. Бул тууралуу Tengrinews.kz басылмасы өлкөнүн Тышкы иштер министрлигине шилтеме берүү менен билдирди.

Маалыматка караганда, Казакстандын Бириккен Улуттар Уюмундагы туруктуу өкүлү Кайрат Умаров өлүм жазасын жокко чыгарган жарандык жана саясий укук жөнүндөгү Эл аралык пакттын экинчи факультативдик протоколуна кол койду.

Өлүм жазасын жокко чыгарган эл аралык протоколго кошулуу чечими кабыл алынганын мамлекет башчысы Касым-Жомарт Токаев дагы өзүнүн БУУнун Башкы ассамблеясынын сессиясында сүйлөп жатып билдирген.