Казакстанда коронавируска кабылгандардын саны алтыга жетти. Мындай маалыматты Казакстандын Саламаттыкты сактоо министрлигинин расмий өкүлү Диас Ахметшарип жалпыга маалымдоо каражаттарына билдирген.
"Бүгүн аныкталган эки учурдун бири Алматы шаарында, экинчиси Нур-Султанда болуп чыкты. Алматыда жашаган 62 жаштагы ишкер ал шаарга 10-март күнү Москвадан келген. Ал эми Нур-Султандагы аял Варшавадан келген", — деди Диас Ахметшарип.
Маалыматка караганда, коронавирус жуктургандардын төртөө Алматыда, экөө Нур-Султандагы ооруканада жатат.
Эске салсак, Казакстанда коронавирус илдетине чалдыккан 2 адам кечээ, 13-мартта, билинген. Ошол эле күнү вирус жуктурган дагы 2 адам тууралуу да белгилүү болгон. Алардын экөө Германиядан, бири Италиядан, бири Россиядан учуп келген.
Пикирлер (0)
Пикир жок. Сиз биринчилерден болушуңуз мүмкүн