Казакстандан Кыргызстанга унааны мыйзамсыз алып кирүү аракети көрүлгөн

Казакстандан Кыргызстанга унааны мыйзамсыз алып кирүү аракети көрүлгөн.

Мамлекеттик бажы кызматынан билдиришкендей, «Манас» бажысынын кызматкерлери текшерүү иш-чараларынын алкагында «Ак-Тилек» товарларды каттоо пунктунун аймагында К.С.Б. аттуу жарандын башкаруусунда Казакстандан Кыргызстандын аймагына келе жаткан, Литванын мамлекеттик каттоо номери менен 2012-жылы чыгарылган Volvo FН 4ХТ үлгүсүндөгү жүк ташуучу унааны текшерүүгө алышкан.

Берилген документтерди текшерүүнүн жүрүшүндө аталган унаа Казакстандын аймагында Бурабай протоколунун ченемдерин жана ЕЭКтин 2015-жылдын 14-октябрындагы №59 Чечимин колдонуу менен таризделгени аныкталган.

Бурабай протоколунун 3-беренесинин 4-пунктуна ылайык, Казакстан жеңилдетилген чен боюнча ташып кирүү бажы алымдарын төлөө менен Казакстандын аймагына киргизилген товарларды ЕАЭБдин башка мүчө-мамлекеттеринин аймагына ташып чыгууга жол бербөө боюнча чараларды көрүүнү камсыз кылат.

Казакстандын аймагында мурда төлөнгөн бажы алымдарын эске алуу менен товарларды «ички керектөө үчүн чыгаруу» бажы жол-жобосуна жайгаштырууда төлөөгө тийиш болгон бажы алымдарынын суммасы 1 323 624 сомду түздү.

Факты КБР МКЖ АДСке катталып, материалдар юридикалык баа берүү жана караштуулугу боюнча өткөрүп берүү үчүн КР Башкы прокуратурасына өткөрүп берилди.