Кичи автобустар жол кирени 19-20 сомго көтөрүүнү талап кылышты

 Бүгүн, Бишкек мэриясынын жыйындар залында мэрдин милдетин аткаруучу Балбак Түлөбаев жеке менчик транспорттук компаниялардын жетекчилери менен жолугушту. Бул тууралуу мэриянын басма сөз кызматы кабарлады.

Жеке кичи автобустарда жүрүү тарифтерин этап-этабы менен көтөрүү маселеси кайрадан талкууланды.

Маршруттук фирмалардын ээлери тарифтерди 19-20 сомго чейин көтөрүүнү талап кылышты.

Мэрдин милдетин аткаруучу каттамга чыккан кичи автобустардын жол киресин ушул убакытка чейин 15 сомго чейин, автобустар менен троллейбустар үчүн жол акысын убактысына карабастан 10 сомго көтөрүүнү сунуштады. Пенсионерлер жана балдар 8 сом төлөшөт.

 Балбак Түлөбаев Бишкек шаарынын мэриясынын алдында транспорттук саясат боюнча кеңеш түзүүнү тапшырды, ал борбор калаанын транспорттук тутумун реформалоо боюнча жарандардын, айдоочулардын, муниципалдык кызматкерлердин жана жеке транспорттук компаниялардын жетекчилеринин жолугушуусу үчүн аянтчага айланат.

Ошондой эле милдетин аткаруучу жеке фирмалардын жетекчилеринен натыйжалуу иш алып баруу үчүн Б.Түлөбаевдин коомдук кеңешчиси боло турган бир өкүлдү шайлоону суранды.

Эл ташуучу компаниялардын директорлору айдоочулардын иш таштоосун үчүнчү жактар ​​уюштуруп, жамааттардын ичиндеги кырдаалды туруксуздаштырууга аракет кылышкан деп билдиришти.