1-декабрдан тарта Бишкектеги кинотеатрлардын жана фудкорттордун ишин жандандыруу пландалууда. Бул тууралуу коронавирус боюнча түзүлгөн республикалык штаб кабарлады.
Шаар мэринин милдетин аткаруучу Балбак Түлөбаевдин айтымында, бардык санитардык талаптарды эске алуу менен 1-декабрдан тарта кинотеатрлардын жана фудкорттордун ишин жандандыруу пландаштырылууда.
Ошондой эле, супермаркеттерге мурдагыдай күнү-түнү иштөөгө уруксат берүү пландаштырылууда. Учурда тойкан жана ресторандар үчүн алгоритмди иштеп чыгуу аяктап жатат.
Эске салсак, экономикалык иш-аракеттерди жандандыруу максатында, Кыргыз Республикасынын Өкмөтү 2020-жылдын 1-декабрынан тартып, жергиликтүү өз алдынча башкаруу органдарына ишенип берилген аймактарда иш-аракеттердин ар кандай түрлөрүнө керектүү санитардык-эпидемиологиялык жана башка эрежелерди сактоо менен уруксат берүү ыйгарым укуктарын берүүнү сунуш кылган.
"Ошол эле учурда, сөзсүз түрдө төмөнкүлөр сакталууга тийиш: беткап режими, социалдык аралык жана башка санитардык-эпидемиологиялык эрежелер. Тиешелүү мамлекеттик органдар оорунун таралуу деңгээлине жана медициналык мекемелердеги оорчулук деңгээлине ылайык, жер-жерлерде эпидемиологиялык кырдаалдын коопсуздугун көзөмөлдөө үчүн тиешелүү алгоритмдерди иштеп чыгышат. Республикалык Штаб COVID-19 боюнча аймактардагы кырдаалды көзөмөлдөп турат ", - деп билдирди вице-премьер-министр Э.Сурабалдиева.
Пикирлер (0)
Пикир жок. Сиз биринчилерден болушуңуз мүмкүн