Кыргызстан Алтын-Мазар жайлоосун тажик тарапка өткөрүп берген деген маалымат чындыкка дал келбейт - Ташиев

Кыргызстан Алтын-Мазар жайлоосун тажик тарапка өткөрүп берген деген маалымат чындыкка дал келбейт. Бул тууралуу бүгүн Жогорку Кеңештин тармактык комитеттеринин биргелешкен жыйынында министрлер кабинетинин төрагасынын орун басары – УКМК төрагасы Камчыбек Ташиев билдирди.

Анын айтымында, учурда Кыргызстан Алтын-Мазарды Тажикстанга берген деген чындыкка дал келбеген кеп эл арасында жүрүп жатат. 

“Кайда болбосун мени урушуп, жерибизди берип койдуң деп айыптап жатышат. Бул туура эмес. Алтын-Мазарды эч кимге берген жокпуз. Бул биздин жер жана өзүбүздө эле калат. Чындыкка дал келбеген кептер бирөөлөрдүн ойлоп тапкан орунсуз ойлору”, - деди ал.

Эске салсак, бүгүн Жогорку Кеңеште кыргыз-тажик мамлекеттик чек арасын делимитациялоо боюнча келишимди ратификациялоо маселеси каралууда. Учурда Эл аралык иштер, коргоо, коопсуздук жана миграция, Агрардык саясат, суу ресурстары, экология жана регионалдык өнүктүрүү, Транспорт, коммуникациялар, архитектура жана курулуш, Конституциялык мыйзамдар, өкмөт, сот-укуктук маселелер жана Жогорку Кеңештин Регламенти боюнча комитеттердин кошмо жыйыны өтүүдө. 

Кийинчерээк парламенттин жалпы жыйыны болот.