Кыргызстан менен Россиянын ортосундагы укуктук маселелер талкууланды

Күн мурун башкы прокурор Максат Асаналиев Россиянын Жогорку сотунун төрагасынын милдетин аткаруучусу Петр Серков жана юстиция министри Константин Чуйченко менен жолукту.

Башкы прокуратурадан билдиришкендей, жолугушууну жүрүшүндө эки өлкөнүн кызматташуусунун негизги маселелери, анын ичинде 1998-жылдагы Кылмышкерлерди өткөрүп берүү тууралуу КМШ Конвенциясынын жоболорун ишке ашыруу талкууланды. Айрыкча, Россияда жаза өтөп жаткан КР жарандарынын санынын көбөйүшү маселесине өзгөчө көңүл бурулду, учурда бул көрсөткүч 1370 кишини түзөт.

Петр Серков менен болгон жолугушууда жаза өтөп жаткан кыргыз жарандарынын укуктарын коргоо жана аларды мекенине өткөрүп берүү процессинде координацияны күчөтүүнүн зарылдыгы баса белгиленди. Асаналиев Жогорку соттун мыйзамдуулукту жана коомдук тартипти бекемдөөдөгү маанилүү ролун белгилеп өттү.

Константин Чуйченко менен болгон жолугушууда тараптар жаза өтөп жаткан кыргыз жарандарын Кыргызстанга өткөрүп берүүдө оң жылыштарды белгилешти. 2024-жылдын башынан тартып 77 жаран өткөрүлүп берилсе, дагы 56 жаранды этап менен өткөрүү процесси жүрүп жатат. Бул процессти оптималдаштыруу максатында документтерди өткөрүп берүү мөөнөтүн кыскартуу жана мекемелердин ортосундагы өз ара аракеттенүүнү жакшыртуу боюнча конкреттүү чаралар талкууланды.

Жолугушуулардын жыйынтыгында РФ Юстиция министрлиги менен өз ара түшүнүшүү тууралуу меморандумга кол коюлду, бул юридикалык чөйрөдөгү кызматташууну мындан ары бекемдөөгө жаңы мүмкүнчүлүктөрдү ачат. Максат Асаналиев конструктивдүү диалог үчүн ыраазычылык билдирип, жарандардын укуктарын коргоо жана укук колдонуу процессин өркүндөтүү багытында мындан аркы кызматташууга даяр экенин белгиледи.

КР башкы прокурору Максат Асаналиев азыркы тапта Россиянын Москва шаарында иш сапары менен жүрөт.