“Ынтымак Ордодо” Кыргызстан менен Тажикстандын мамлекеттик чек арасы жөнүндөгү келишимге эки өлкөнүн президенттери Садыр Жапаров менен Эмомали Рахмон кол коюшту.
Белгилей кетсек, үстүбүздөгү жылдын 21-февралында кыргыз-тажик чек арасын делимитациялоо жана демаркациялоо боюнча эки өлкөнүн өкмөттүк делегацияларынын тең төрагалары Камчыбек Ташиев менен Саймумин Ятимов комиссиялар толук макулдашууга келгенин жарыялашкан.
Ал эми 27-февраль күнү Жогорку Кеңештин алты комитетинин биргелешкен жыйыны өтүп, ага Кыргызстан-Тажикстан мамлекеттик чек арасы боюнча бир келишим, эки макулдашуунун долбоору Улуттук коопсуздук мамлекеттик комитетинин төрагасы Камчыбек Ташиев тарабынан депутаттардын талкуусуна сунушталган. Мында УКМК төрагасы чек араны тактоодо эки тараптын кызыкчылыгы эске алынганын жана мурдагы эки ача пикирлер боюнча бир пикирге келишкенин билдирген. Парламенттин комитетинин мүчөлөрү кыргыз-тажик чек ара келишимин талкуусуз эле жактырышкан.
Камчыбек Ташиевдин маалыматы боюнча, Кыргызстан менен Тажикстандын ортосундагы мамлекеттик чек аранын жалпы узундугу 1006,84 чакырымды түзөт. Анын ичинен 519,9 чакырым чек ара тилкеси 2011-жылга чейин такталып, жазылып, өкмөттүк делегациялар тарабынан бекитилген. Ал эми калган 486,94 чакырым тилкеси акыркы үч жыл ичинде такталды.
Кыргызстан менен Тажикстандын мамлекеттик чек арасы жөнүндөгү келишимге кол коюлгандан соң, Лейлек районундагы "Кайрагач" жана Баткен районундагы "Кызыл-Бел" чек ара көзөмөл өткөрүү бекеттери ачылмакчы.
Эске салсак, эки мамлекеттин чек арасы 2021-жылы май айында болгон кагылыштан кийин жабылган.
Белгилей кетсек, Тажикстандын президенти Эмомали Рахмон кечээ, 12-мартта, Кыргызстанга мамлекеттик сапар менен келген.
Пикирлер (0)
Пикир жок. Сиз биринчилерден болушуңуз мүмкүн