Министрлер кабинетинин төрагасынын орун басары – суу ресурстары, айыл чарба жана кайра иштетүү өнөр жайы министри Бакыт Төрөбаев Венгриянын элчиси Шандор Дороги менен жолугушту.
Ведомстводон маалымдашкандай, жолугушууга элчиликтин өкүлдөрү, Венгрия айыл чарба жана жашоо илими университетинин ректору Чаб Дюрич жетектеген делегация, ошондой эле Кыргыз улуттук агрардык университетинин өкүлдөрү катышты.
Тараптар илимий-билим берүү өнөктөштүгүн өнүктүрүү, квалификациялуу адистерди даярдоо, тажрыйба алмашуу, ошондой эле мындан ары тышкы рынокко жеткирүү үчүн Кыргызстанда үрөн өстүрүү мүмкүнчүлүктөрүн талкуулашты.
Венгрия университетинин ректору биргелешкен илимий изилдөөлөрдү иштеп чыгууга, малинанын жана карагаттын венгриялык сортторун адаптациялоого, кайра иштетүүчү ишканаларды түзүүгө, ошондой эле, кургакчылык жана климаттын өзгөрүшү менен күрөшүү боюнча кызматташууга кызыкдарлыгын билдирди.
Тараптар студенттерди окутуу программасын ишке киргизүү, ошондой эле агрардык чөйрөдөгү кыргыз студенттерине 20 билим берүү квотасын бөлүү мүмкүнчүлүгүн карашты. Венгрия тарап айыл чарба тармагындагы кызматташтыкты бекемдөөнүн маанилүүлүгүн белгилеп, кыргыз аграрийлерин тармакты өнүктүрүүдө колдоого даяр экендигин билдирди.
Бакыт Төрөбаев өлкөнүн агроөнөр жай комплексин өнүктүрүүнүн 5 артыкчылыктуу багыттарынын бири катары агрардык сектордогу илимий-билим берүү багытын өнүктүрүүнүн маанилүүлүгүн белгиледи. Жогорку квалификациялуу адистерди даярдоо, алдыңкы илимий ыкмаларды киргизүү жана чет өлкөлүк өнөктөштөр менен тажрыйба алмашуу өлкөнүн агроөнөр жай потенциалын чыңдоодо маанилүү роль ойноорун белгиледи.
Министр белгилегендей, агрардык илим жаатындагы венгриялык адистер менен кызматташуу Кыргызстандын айыл чарбасын өнүктүрүүгө, анын ичинде тармакты климаттын өзгөрүшүнө адаптациялоо үчүн чечимдерди иштеп чыгууга олуттуу салым кошо алат.
Жолугушуунун соңунда министр Бакыт Төрөбаев кыргыз тарап Венгрия менен айыл чарба тармагында өнөктөштүк мамилелерди мындан ары өнүктүрүүгө жана кызматташууга даяр экендигин баса белгиледи.
Пикирлер (0)
Пикир жок. Сиз биринчилерден болушуңуз мүмкүн