Кыргызстан менен Вьетнам энергетика тармагында үч меморандумга кол коюшту

Кыргызстан менен Вьетнам энергетика тармагында үч меморандумга кол коюшту.

Энергетика министрлигинен билдиришкендей, министрлер кабинетинин төрагасы-Адылбек Касымалиевдин Вьетнамга болгон расмий визитинин алкагында энергетика министри Таалайбек Ибраев Ханой шаарында Вьетнамдын бизнес-коомчулугу менен жолугушууга катышты. 

Бизнес диалогдун жүрүшүндө Кыргыз Республикасынын инвестициялык мүмкүнчүлүктөрү жөнүндө президентине караштуу Инвестициялар боюнча Улуттук агенттиктин директору Таалайбек Иманов, өлкөнүн энергетикалык потенциалы жана негизги энергетикалык долбоорлор жөнүндө энергетика министри Таалайбек Ибраев баяндама жасады. 

Вьетнамдык ишкерлер өз кезегинде активдүү кызматташууга даяр экендиктерин билдиришти.

Жолугушуунун жыйынтыгында тараптар диалогду улантууну жана эки тараптуу өнөктөштүктү бекемдөөгө багытталган конкреттүү демилгелерди кароону макулдашышты.

Жолугушуунун алкагында өз ара түшүнүшүү жөнүндө документтерге кол коюп, алмашуу аземи болду. 

Төмөнкү документтерге кол коюлду:

- Энергетика министрлиги менен Вьетнамдын өнөр жай жана соода министрлигинин ортосундагы өз ара түшүнүшүү жөнүндө меморандум;

- Энергетика министрлиги менен Vtech компаниясынын (Вьетнам)ортосундагы өз ара түшүнүшүү жөнүндө меморандум; 

- "Кыргызстандын улуттук электр тармагы" ААК менен Вьетнамдын электр энергетика системасынын жана рыногунун улуттук операторунун ортосундагы өз ара түшүнүшүү жөнүндө меморандум.

Белгилей кетсек, бүгүн, 7-мартта министрлер кабинетинин төрагасы Адылбек Касымалиев Вьетнамга расмий визитинин алкагында Ханой шаарында Вьетнамдын бизнес-коомчулугу менен жолугушуу өтүп, ага ар кандай тармактарда иштеген ишкер чөйрөлөрдүн 70ке жакын өкүлү катышты.