Кыргызстан менен Өзбекстандын башкы прокурорлору кызматташуу программасына кол койду

Кыргызстандын башкы прокурору Максат Асаналиев Өзбекстандын башкы прокурору Нигматилла Йулдошев менен эки тараптуу жолугушуу өткөрдү.

Башкы прокуратурадан билдиришкендей, жолугушууда эки өлкөнүн Башкы прокуратураларынын ортосунда 2024-2026-жылдарга кызматташтык программасына кол коюлду.

Кол коюу аземи Шанхай кызматташтык уюмуна мүчө өлкөлөрдүн башкы прокурорлорунун 22-отурумунун жана Түрк мамлекеттеринин уюмунун башкы прокурорлор кеңешинин 3-отурумуна катышуунун алкагында өттү.

Бул программа эки өлкөнүн көзөмөл органдарынын ортосундагы мыйзамдуулукту жана укук тартибин бекемдөө чөйрөсүндө өз ара кызматташууну өнүктүрүүгө багытталган.

"Мында тажрыйба жана маалымат алмашуу, биргелешкен иш-чараларды өткөрүү, кызматкерлердин квалификациясын жогорулатуу, ошондой эле биргелешкен долбоорлорду жана демилгелерди иштеп чыгуу, ишке ашыруу кызматташтыктын негизги багыттары болуп белгиленди", - деп айтылат маалыматта.