Кыргызстанда 1-августтан тарта энергетика тармагына өзгөчө кырдаал режими кирет

Президент Садыр Жапаров Кыргызстанда энергетика тармагына өзгөчө кырдаал режимин киргизүү жөнүндөгү жырлыкка кол койду. Бул тууралуу өлкө башчынын маалымат кызматы билдирди.

Мындай нерсе климаттык чакырыктарга, Нарын дарыясынын бассейнине суунун аз киришине, энергияны керектөөнүн тездик менен өсүшүнө байланыштуу Кыргызстанды энергетикалык кризистен чыгаруу боюнча шашылыш чараларды көрүү максатында жасалууда.

Өзгөчө кырдаал режими быйыл 1-августтан тарта кирип, 2026-жылдын 31-декабрына чейин созулат.

Энергетика министри өзгөчө кырдаал учурунда жер жана суу фонду, жер казынасын пайдалануу маселелерин тескеген айыл чарба, жаратылыш ресурстары, экология жана техникалык көзөмөл министрлеринин орун басарларынын, Улуттук илимдер академиясынын Суу проблемалары жана гидроэнергетика институтунун, "Кадастр" мамлекеттик мекемесинин, "Кыргызгеология" мамлекеттик ишканасынын директорлорунун, жергиликтүү мамлекеттик администрациялардын башчыларынын энергетика чөйрөсүндөгү долбоорлорун координациялайт.

Министрлер кабинетине берилген тапшырма:

- Энергетика министрлигине энергиянын кайра жаралуучу булактарын пайдалануу үчүн жарактуу жер участокторун аныктоо жана бөлүп берүү (кийин кайра Жашыл энергетика фондуна өткөрүлөт);

- кызмат адамдарын ушул жарлыкты ишке ашырууга байланышкан чаралар талаптагыдай аткарылбаган учурда ээлеген кызматынан бошотуу жөнүндө сунуштарды киргизүү;

- энергиянын кайра жаралуучу булактарын пайдалануу үчүн жарактуу жер участокторун инвентаризациялоону жүргүзүү;

- 2023-жылдын 1-сентябрынан тартып белгиленген тартипте энергетика чөйрөсүндөгү объектилерди курууга арналган, максаттуу багыты боюнча пайдаланылбаган же техникалык-экономикалык негиздемени иштеп чыгуу, энергетикалык объектилерди долбоорлоо жана куруу боюнча иштер баштала элек жер участокторун пайдалануу укугун токтотууну демилгелөө;

- энергетика тармагындагы мамлекеттик үлүшү бар мамлекеттик ишканаларга, акционердик коомдорго жана алардын туунду коомдоруна өзгөчө кырдаалдын көрсөтүлгөн режимин киргизүү менен байланышкан иш-чараларды жүзөгө ашыруунун алкагында товарларды, жумуштарды жана кызмат көрсөтүүлөрдү бир булактан сатып алууга уруксат берсин;

- энергетика министринин ушул жарлыктын талаптагыдай аткарылышы үчүн жеке жоопкерчилиги белгиленсин.