Кыргызстанда дагы 11 медкызматкеринен коронавирус аныкталды

Бир сутка ичинде өлкө боюнча 11 медицина кызматкери коронавирус жуктуруп алганы аныкталды. Бул тууралуу саламаттыкты сактоо министринин орун басары Нурболот Үсөнбаев 6-июндагы брифингде билдирди.

Маалыматка ылайык, Бишкек шаарында – 2, Чүй облусунда – 1, Ош шаарында – 7 жана Нарын облусунда – 1 ак халатчандан илдет аныкталган.

Ал эми стационарлардан сутка ичинде 1 медкызматкер айыгып чыгарылган.

Жалпысынан республика боюнча COVID-19 диагнозу менен медициналык кызматкерлер арасында – 389 учур катталды, алардын ичинен 273 медкызматкер стационарлардан айыгып чыккан.