Кыргызстандык боксчу биринчи жолу дүйнө чемпионатында медаль утту

Мунарбек Сейитбек уулу Өзбекстанда өткөн бокс боюнча дүйнө чемпионатында коло медаль тагынды.

Кыргызстандык мушкер 57 килограммга чейинки салмак ченинде күч сынашты.

Ал Пуэрто-Рико, Таиланд, Мексика, Тажикстандын спортчуларын 4 жолу катары менен жеңип, жарым финалга чыкты. Сейитбек уулу 12-майда өзбекстандык Абдумалик Халоков менен беттешип, ага жеңилип калган. Бул салмак категориясынын жыйынтыктоочу протоколунда кыргызстандык спортчу 3-орунду ээлеп, коло медалга ээ болот.

Бул медаль Кыргызстан үчүн чоңдор арасындагы дүйнөлүк чемпионаттардын тарыхында биринчи болуп калат.