Кыргызстанга вакцина сактоо үчүн 200дөй муздаткыч келиши күтүлүүдө

Кыргызстанга Pfizer BioNTech вакцинасын сактоо үчүн 200гө жакын муздаткыч келиши күтүлүүдө. Бул тууралуу брифинг учурунда Республикалык иммунопрофилактика борборунун башкы адиси Азим Кыргызбаев билдирди.

Анын айтымында, 27-октябрда өлкөгө Pfizer BioNTech вакцинасы келген.

"Аталган вакцина -80 градуста сакталгандыгы үчүн Саламаттык сактоо министрлиги тарабынан жыл башынан тарта даярдыктар көрүлүп келген. Аталган вакцинаны сактоо жана таратуу үчүн муздаткыч жабдуулары эсептелип, жакынкы арада ЮНИСЕФ аркылуу 200гө чукул атайын муздаткыч жабдуулары келээри күтүлүүдө. Бул үчүн медициналык кызматкерлер атайын окуудан өттү", - деди ал.

Азим Кыргызбаев белгилегендей, Pfizer BioNTech вакцинасынын эрежесине ылайык борбордук деңгээлде -80 градуста 6 айдан 9 айга чейин сактаса болот жана ошондой эле облустарда -15 тен -20 градуска чейин эки жума сактоого, район жана убактылуу эмдөө пунктарында +2 ден +8 градуска чейин бир жума сактаса болот.

Ошондой эле ал убактылуу эмдөө пунктарындагы +2 ден +8 градуска чейин муздаткыч жабдуулары өлкө боюнча жетиштүү экенин кошумчалады.